بمبەخشە - بەهروز بووچانی
باڵندەکەم، بمبەخشە، کە ناتوانم لە باوەشت بگرم.
بەڵام لێرە
لەم سووچەدا،
چەند باڵندەیەکی کۆچبەر دەناسم کە لەگەڵ کازیوەیا زەردەخەنەیان بۆ دەکەم
و
بە باڵی کراوەی هێند فراوانی ئاسمان لە ئامێزیان دەگرم.
ئەوینە جوانەکەم!
بمبەخشە کە ناتوانم عەتری بۆنخۆشی هەناسەکانت هەڵقوڕێنم،
بەڵام لێرە، لەم وێرانەیەدا،
چەند گوڵێکی کێوی دەناسم کە هەموو بەیانیەک لە دڵمدا گەشە دەکەن،
لە کۆتایی شەویشدا، لەگەڵ مندا و لە جێگاکەمدا خەو دەیانباتەوە.
فریشتەکەم بمبەخشە!
من ناتوانم بە سەری پەنجەکانم دەست بە پێستتدا بهێنم.
بەڵام هاوڕێیەتی تەمەنێکم لەگەڵ شنەی دەریا و و ئەو شنەبایانەدا هەیە
کە لێرە ، لەم دۆزەخە سەوزەدا، هەڕەمەکیانە بەر پێستی ڕوتم دەکەون!
بمبەخشە، کە ناتوانم بەسەر چیای سەوزی جەستەتدا هەڵبگەڕێم،
بەڵام لێرە، لە جەرگەی تاریکیدا، لە هەموو نیوەشەوێکدا، لەگەڵ درێژترین
و لەخۆبایترین درەختی گوێز هنددا، چێژ لە گوزارشتی غەریبانە وەردەگرم.
جوانەکەم! لە مەعریفە و حیکمەتی
کۆنترین و غەریبترین گۆرانیەکان، گۆرانییت بۆ دەڵێم،
زۆر دوورتر، لە جیهانی پیاوێکەوە
کە لە نێو قۆڵترین زەریاکان و تاریکترین دارستانەکانەوە خۆشی دەوێی.
لە نێو قەفەسێکدا،
ئەو پیاوەی خۆشی دەوێی،
لە نێو قەفەسێکدایە کە کەوتۆتە نێوان مەزنترین زەریاکان و سەوزترین دارستانەکان.
خۆشەویستم، بمبەخشە.
بمبەخشە خۆشەویستم کە تەنها دەتوانم لە دورگەیەکی دوورەوە خۆشم بوێیت،
لە نێو قەفەسەکەدا،
لە سوچی ئەم ژوورە بچووکەوە.
تکایە بمبەخشە، کە تاکە بەشی زەوی من خاوەنی بم، ئەم پارچانەیە.
Comments
Post a Comment