لە ئاشتییدا نیم - سێرتۆماس وایات

 


سێر تۆماس وایات

سێر تۆماس وایات( ١٥٠٣-١٥٤٢) شاعیر و سیاسییەکی ئنگلیزی سەدەی شازدەهەم بوو. ئەو بە گوێزەرەوەی شیعری سۆنێت     دادەنرێت لە ئەدەبیاتی ئیتاڵییەوە بۆ نێو شیعری ئنگلیزی. شیعری "لە ئاشتییدا نیم" ی تۆماس وایات کە وەرگێڕانی سۆنێتی ١٠٤ ی   شاعیری ئیتاڵی پێترارک (١٣٠٤-١٣٧٤)ە، مامەڵە لەگەڵ ئەزموونێکی خۆشەویستی پڕناکۆکی دەکات کە هەستگەلێکی دژبەیەکیان تێدا دروست کردووە. خوێندنەوەی ژیاننامەییانە بۆ شیعرەکە خوێنەر دەباتەوە بۆ ئەزموونی خۆشەویستی تۆماس وایت بۆ شاژنە ئانا   بۆڵین کە شاعیری دووچاری توڕەیی خێزانی شاهانە و چەند جارێک زیندانیکردن کردنەوە. شیعرەکە تێکەڵەیەکە لە هەستە پڕشادی    و پڕئازارەکانی شاعیر کە لە دۆخێکی پڕ ناکۆکییدا گیری خواردووە و بێ چارە ماوەتەوە.                                                         

 

لە ئاشتییدا نیم

لە ئنگلیزییەوە: ڤییەننا سەلام

 

لە ئاشتییدا نیم و هەموو جەنگەکانیشم بە کۆتا هاتوون،

دەترسم و بە ئومێدیشم. دەسوتێم وچوون بەفر دەیبەستم.

بەسەر باوە دەفڕم و هەر بەرز نابمەوە؛

هیچیشم  نییە و تەواوی دونیام داگیر کردووە.

ئەوینێک کە دونیام لێ توند و شل دەکاتەوە بەندم دەکات

نەیگرتووم -لەگەڵ ئەوەشدا – ڕێگایەک بۆ هەڵاتن لە گۆڕێ نییە

نە دەهێڵێ بژیم نە بە دەردی خۆمەوە بمرم،

سەرەڕای ئەوەش بەردەوام ئاواتەخواز بە مەرگم دەکات.

بە بێ چاو دەبینم و بێ زمان دەردەبڕم.

ئارەزوومە لە ناو بچم و تەمەندرێژیشم دەوێت.

کەسێکی دیکەم خۆش دەوێت، هەربۆیە قینم لە خۆمە

خۆراک دەدەم بە غەمەکەم و پێکەنینم بە ئازارەکانم دێت؛

بەم جۆرە هەردوو ژیان و مەرگ نائوێمێدیین و

دڵشادییەکەم هۆکاری ئەم نەهامەتییەمە.

 

 

 

 

Comments