"گۆڕانێک لە ڕووناکییدا" ی ڕۆزمێری واتۆڵا ترۆمەر

ڕۆزمێری واتۆڵا ترۆمەر شاعیرێکی ئەمریکییە و لە ئێستادا لە پلاسەرڤێڵ لە ویلایەتی کۆلۆرادۆ دەژی. خاوەنی دوانزە کۆمەڵە شیعرە و شیعرەکانی لە بڵاوکراوەکانی وەکو O Magazine و A Prairie  Home Companion دا بڵاوبوونەتەوە. خاوەنی وێبسایتێکە بە ناوی Word  و  Woman کە لێرەدا لینکەکەی دادەنێم. https://www.wordwoman.com/

گۆڕانێک لە ڕووناکییدا
ڕۆزمێری واتۆڵا ترۆمەر
لە ئنگلیزییەوە: ڤیەننا سەلام

لە ئێستادا کە مانگەشەو لە پشتی هەورەکانەوە

خۆی حەشارداوە،

لە ئێستادا کە باران لە ناوەڕاستی زستاندا دادەکات،

ئێستاکێ کە پێیان گووتوین

لە ترسی نەخۆشی گرتن و بڵاوبوونەوەیدا

باوەش و ماچی یەکدی نەکەین

بەڵێ ئێستا کاتی ئەوەیە هەرچەندێک

ڕووناکیی شاردراوەی ناخمان هەیە

 بیدۆزینەوە

هەرچی درەوشانەوەشە کە تا ئێستا توانیومانە لە یەکدی و

لە خۆمانی بشارینەوەو

ئێستا کاتی ئەوەیە ئەو ڕۆشنکەرەوەیە بهێنینە پێش و

بێ بەرامبەر پێشکەشی جیهانی بکەین،

لە ئێستادا کە ڕوناکی لە هەر شتێکی دی گرنگترە.